ئۇيغۇر ھەرىكىتى تەشكىلاتى مۇيەسسەر ئابدۇلئەھەد خەنداننىڭ BBC تاللىغان «2020-يىل دۇنياغا تەسىر كۆرسەتكەن يۈز ئايال»تىزىملىكىگە كىرگەنلىكىنى قىزغىن تەبرىكلەيدۇ. مۇيەسسەر قۇرغان «ئايخان مائارىپى» مۇھاجىرەتتىكى ئۇيغۇر پەرزەنتلىرىگە ئۇيغۇر تىلى 
ئۆگىتىدىغان ئوقۇتۇش ئورنى بولۇپ، چەت ئەلدە پاناھلىنىۋاتقان شەرقىي تۈركىستانلىق ئۇيغۇرلار يۈزلىنىۋاتقان مەسىلىلەرنى ھەل قىلىشنى نىشان قىلغان. بۇ ئۇيغۇرلار چەت ئەلدە تۇرۇپ ئۆز تىلى ۋە مەدەنىيىتىنى ساقلاپ قېلىشقا تىرىشىش بىلەن بىر ۋاقىتتا، غايەت زور ئىقتىسادىي ۋە سىياسىي بېسىملارغا دۇچ كەلگەن.
ئۇيغۇر ھەرىكىتى تەشكىلاتىنىڭ باشلىقى روشەن ئابباس خانىم مۇيەسسەرنىڭ بۇ تىزىملىككە كىرگەنلىكى ھەققىدە مۇنداق دەيدۇ:«خەلقىمىزنىڭ بېشىغا قانداق ئىشلارنىڭ كېلىشىدىن قەتئىينەزەر مۇيەسسەر ئۇيغۇرلۇقنى ساقلاش قېلىش ئۈچۈن تىرىشتى، ئايخان تىل تەربىيەلەش مەركىزىنى قۇرۇپ ئۇيغۇر بالىلارغا ئانا تىلىنى ئۆگەتتى، شۇنداقلا خىتاينىڭ ئىنسانىيەتكە قارشى جىنايەتلىرىنى ئەكس ئەتتۈرۈپ بېرىدىغان رومان يازدى. مۇيەسسەرنىڭ ئەمگىكى بىزگە ئۇيغۇر ئاياللىرىنىڭ كۈچىنى تونۇتىدۇ، مەن مۇيەسسەرنىڭ بىزنىڭ ئىشلىرىمىزغا ئىلھام بەرگەنلىكىگە رەھمەت ئېيتىمەن».
چەت ئەللەردە سەرسان بولۇپ يۈرۈۋاتقان ئۇيغۇر ئاياللىرى ۋە بالىلىرى ئىرقىي قىرغىنچىلىقنىڭ زىيانكەشلىكىگە ئۇچرىغۇچىلار بولۇپ، بىز خەلقئارا جەمئىيەتنى بۇ قورقۇنچلۇق جىنايەتنى توختىتىشقا، شۇنداقلا ئۇيغۇر مۇساپىرلىرىنىڭ ئىقتىساد، مائارىپ ۋە مەدەنىيەت ئىشلىرىغا ياردەم بېرىشكە چاقىرىمىز».
ئۇيغۇر ھەرىكىتى تەشكىلاتى خادىملىرى يېقىندا تۈركىيەگە قىلغان سەپىرىدە ئىستانبۇلدىكى ئۇيغۇر ئاياللىرى بىلەن كۆرۈشۈپ، مۇھاجىرەتتىكى ئۇيغۇرلار دۇچ كەلگەن ئىجتىمائىي كىرزىسنى ھەل قىلىش بىرگە ئۇلارنىڭ مەنىۋى مىراسلىرى، يەنى تىلى ۋە مەدەنىيىتىنى قوغداپ قېلىش جەھەتتە ئۇچراۋاتقان قىيىنچىلىقلىرى ھەققىدە سۆھبەتلەشتى؛ سۆھبەت داۋامىدا بۇ مەسىلىلەرنى ھەل قىلىش توغرۇلۇق ئىجادىي پىكىرلەر ئوتتۇرىغا قويۇلدى. ئۇيغۇر ھەرىكىتى تەشكىلاتى ئۇيغۇر ئاياللىرىنىڭ بۇ جەھەتتىكى پاراسىتى ۋە مۇستەھكەم ئىرادىسىگە چوڭقۇر ھۆرمەت بىلدۈرىدۇ.
بىز مۇھاجىرەتتىكى ئۇيغۇرلارغا ياردەم بېرىشنى خالايدىغان بارلىق شەخس ۋە تەشكىلاتلارغا ئىلھام بېرىمىز. ئۇيغۇر ھەرىكىتى تەشكىلاتى مۇھاجىرەتتىكى ئۇيغۇر ئاياللىرى ۋە بالىلارنىڭ ھوقۇقىنى قوغداشنى ئۈمىد قىلغانلارنى زۆرۈر ئىمكانىيەتلەر بىلەن تەمىنلەشكە داۋاملىق تىرىشىدۇ.
