22-ئاپرىل ۋاشىنگتوندا ئۆتكۈزۈلگەن خەلقارا دىنىي ئەركىنلىك يۇمۇلاق ئۈستەل سۆھبەت يىغىنىغا ئۇيغۇر ھەرىكىتى تەشكىلاتىنىڭ رەئىسى رۇشەن ئابباس خانىم ۋە ئۇيغۇر تەتقىقات مەركىزىنىڭ دىرېكتورى ئابدۇلھاكىم ئىدرىسلارمۇ قاتنىشىپ، خىتاي مۇستەبىت ھاكىمىيىتىنىڭ شەرقىي تۈركىستاندا داۋام قىلدۇرىۋاتقان ئىرقىي قىرغىنچىلىق جىنايەتلىرىنى ئوتتۇرىغا قويدى.
ئابدۇلھاكىم ئىدرىس ئەپەندى سۆزىدە، خىتاينىڭ شەرقىي تۈركىستاننى تالان-تاراج قىلىش سىياسىتىنى، بۇنىڭ تەركىبىدە ئۇيغۇرلارنىڭ ئۆي-ماكانى ۋە يەرلىرىنى ئۆكتەملىك بىلەن تۆلەمسىز، رازىلىقسىز مۇسادىرە قىلىش، 3 مىليون 300 مىڭدىن ئارتۇق ئۇيغۇرنى خىتاي ئۆلكىلىرىگە يۆتكەپ مەجبۇرىي ئەمگەككە سېلىش، بىر مىليوندىن ئارتۇق نارىسىدە بالىلارنى دۆلەتنىڭ ياتاقلىق مەكتەپلىرىگە ئورۇنلاشتۇرۇپ، ئۇلارنى دىنىي ئىتىقادىدىن، مىللىي ئۆرپى-ئادىتىدىن، مىللىي مۇھىتىدىن ئايرىپ تاشلاشتەك ئىنسانىيەتكە قارشى جىنايەتلىرىنى ئوتتۇرىغا قويدى ھەمدە خىتاينىڭ بۇ ئىرقىي قىرغىنچىلىق جىنايەتلىرىگە چەكلىمە قويۇشىنى تەلەب قىلدى.
