ئۇيغۇر ھەرىكىتى تەشكىلاتنىڭ رەئىسى روشەن ئابباس، ئۇيغۇر تەتقىقات مەركىزىنىڭ مۇدىرى ئابدۇلھېكىم ئىدرىس ئىككىيلەن كىرودىيەنىڭ پايتەختى زاگرېپ شەھىرى بىلەن چېخىيەنىڭ پايتەختى پىراگا شەھىرىدە بىر قاتار پائالىيەتلەر ئېلىپ بارغان.
2-ئاينىڭ 3-كۈنىدىن 6-كۈنىگىچە كىرودىيەنىڭ پايتەختى زاگرېپ شەھىرىدە ئارقا-ئارقىدىن پائالىيەت ئۆتكۈزۈپ ئۇيغۇرلارنىڭ ھازىرقى ئېغىر ۋەزىيىتى، دۇنيادىكى ھەر قايسى دۆلەتلەرنىڭ ئۇيغۇر مەسىلىسىگە بولغان پوزىتسىيەسى ۋە ئالغان تەدبىرلىرى توغرىسىدا مەلۇمات بەرگەن.
ئۇيغۇر ھەرىكىتى تەشكىلاتنىڭ رەئىسى روشەن ئابباس خانىم بۇ ھەقتە بىزگە مەلۇمات بېرىپ مۇنداق دېدى: «3-فېۋرال كۈنى بېلگىيەنىڭ پايتەختى بىريۇسسېلدىن كىرودىيەنىڭ پايتەختى زاگرېب شەھىرىگە كەلدۇق. كېلىپلا زاگرېب شەھىرىدىكى ‹كىشىلىك ھوقۇق ئۆيى›دە ئۆتكۈزۈلگەن يىغىنغا قاتناشتۇق. بۇ يىغىنغا زاگرېب شەھىرىدە پائالىيەت ئېلىپ بېرىۋاتقان كىشىلىك ھوقۇق تەشكىلاتلىرىنىڭ مەسئۇللىرى، ئاقىللار مەركەزلىرىنىڭ مەسئۇللىرى، مۇتەخەسسىسلىرى ۋە تاشقى سىياسەت مۇنبىرىنىڭ ئەزالىرى ئىشتىراك قىلدى».
روشەن ئابباس خانىم 2 سائەت داۋاملاشقان يىغىندا ئۇيغۇرلارنىڭ ھازىرقى ئېغىر ۋەزىيىتىنىڭ تەپسىلىي ئوتتۇرىغا قويۇلغانلىقىنى بايان قىلىپ مۇنداق دېدى: «كىرودىيە باشتا سابىق يۈگۈسلاۋىيە يىمىرىلىپ مۇستەقىل بولغان بالقان دۆلەتلىرىدە خەلقنىڭ ئۇيغۇرلار توغرىسىدا كۆپ مەلۇماتى يوق ئىكەن. بىز ئۇيغۇرلارنىڭ بېشىغا كەلگەن ئېچىنىشلىق ئەھۋاللارنى ئاڭلاتقان ۋاقتىمىزدا بەك تەسىرلىنىپ كەتتى. چۈنكى بۇ رايوندىمۇ يېقىنقى يىللاردا مىللەتلەر ئارىسىدا زور ئۇرۇشلار بولغانىكەن. كىرودىيە بىلەن سېربىيە ئوتتۇرىسىدىكى جەڭدە ئىز-دېرەكسىز يوق بولۇپ كەتكەن ناھايىتى كۆپ كىشى بار ئىكەن. ئۇنىڭ ئۈستىگە 1992-يىلىدا بوسنىيەدە ئىرقىي قىرغىنچىلىق بولغانىكەن. شۇڭا بىزنىڭ دېگەنلىرىمىزدىن بەكلا تەسىرلەندى».
ئۇيغۇر تەتقىقات مەركىزىنىڭ مۇدىرى ئابدۇلھېكىم ئىدرىس ئەپەندى كىرودىيەدە ئۇيغۇرلار ھەققىدە پائالىيەت بولۇپ باقمىغان دۆلەت ئىكەنلىكىنى، شۇڭا كىشىلىك ھوقۇق تەشكىلاتلىرى بىلەن ئېلىپ بارغان يىغىندا بۇندىن كېيىن كىرودىيە ۋە قوشنا دۆلەتلەردە نېمىلەرنى قىلىش توغرىسىدىمۇ مۇزاكىرە ئېلىپ بېرىلغانلىقىنى ئوتتۇرىغا قويدى.
ئابدۇلھېكىم ئىدرىس ئەپەندى كىرودىيەدە ئېلىپ بارغان ئۈچ كۈنلۈك زىيارەت جەريانىدا كۆپ ساندا ئاخبارات ئورگانلىرىنىڭ زىيارىتىنى قوبۇل قىلىپ، ئۇيغۇرلار توغرىسىدا مەلۇمات بەرگەنلىكىنى بايان قىلدى.
روشەن ئابباس ۋە ئابدۇلھېكىم ئىدرىس ئىككىيلەن چېخىيەنىڭ پايتەختى پىراگا شەھىرىگە يېتىپ كېلىپ بىر يۈرۈش پائالىيەتلەر ئېلىپ بارغان. ئۇلارنى چېخىيە پارلامېنتىدىكى بەزى پارلامېنت ئەزالىرى ۋە كىشىلىك ھوقۇق تەشكىلاتلىرى بىلەن ئۇچرىشىپ، بۇندىن كېيىن چېخىيەدە ئېلىپ بارىدىغان پائالىيەتلەر توغرىسىدا مۇزاكىرە ئېلىپ بارغان. ئابدۇلھېكىم ئىدرىس ئەپەندى بۇ ھەقتە مەلۇمات بەردى.
روشەن ئابباس خانىم تۈركىيەدىكى پائالىيەتلىرىنى ئاخىرلاشتۇرغاندىن كېيىن 31-يانۋار كۈنى گوللاندىيەدىكى ئامېرىكا ئەلچىخانىسىدا ئۇيغۇرلار توغرىلىق مەخسۇس ئۇچرىشىش ئېلىپ بارغان. بۇ ئۇچرىشىشقا گوللاندىيە پارلامېنتىنىڭ ئەزالىرىدىن رۇبىن برېكېلماس، ئاگنېس مۇلدېر قاتارلىق كىشىلەرمۇ قاتناشقانىدى. ئۇلار مەزكۇر ئۇچرىشىشقا قاتناشقان پارلامېنت ئەزالىرىدىن گوللاندىيە پارلامېنتىدا «ئۇيغۇر دوستلۇق گۇرۇپپىسى» قۇرۇشنى تەلەپ قىلغان. ئۇيغۇر ھەرىكىتى تەشكىلاتنىڭ رەھبەرلىرى گوللاندىيەدىكى پائالىيەتلىرىنى ئاخىرلاشتۇرۇپ، 1-فېۋرال كۈنى بېلگىيەنىڭ پايتەختى بىريۇسسېلدىكى ئاخبارات كۇلۇبىدا ياۋروپا كىشىلىك ھوقۇق فوندى تەرىپىدىن ئورۇنلاشتۇرۇلغان «ھەدەم نەدە؟» ھۆججەتلىك فىلىمىنىڭ قۇيۇلۇش مۇراسىمىغا قاتناشقان ۋە د ئۇ ق رەھبەرلىرىمۇ ئىشتىراك قىلغان مۇخبىرلارنى كۈتۈۋېلىش يىغىنى ئۆتكۈزگەنىدى.
خەۋەر مەنبەسى: ئەركىن ئاسىيا
