«ئۇيغۇر ھەرىكىتى» تەشكىلاتى 1-ئاينىڭ 29-30-كۈنلىرى ئىستانبۇل كروۋنە پلازا مېھمانخانىسىدا ئۇيغۇر ياشلىرىنى تەربىيەلەش كۇرسى ئۆتكۈزدى. كۇرستا تۈركىيەنىڭ ئەنقەرە، مارمارا، ھاجى بېكتاشۋېلى، ئىستانبۇل يىلدىز تېخنىكا ئۇنىۋېرسىتېتلىرىدىن تەكلىپ قىلىنغان پروفېسسورلار «ئۇيغۇرلارنىڭ تارىخى»، «ئۇيغۇرلارغا ئېلىپ بېرىلىۋاتقان ئىرقىي قىرغىنچىلىق ۋە بۇنىڭ سەۋەبلىرى»، «ئۇيغۇر داۋاسىنىڭ تارىخى»، «ئامېرىكادىكى ئۇيغۇر دەۋاسى ۋە ئۇنىڭ تەسىرى»، «ئۇيغۇر قىرغىنچىلىقىنىڭ ئۇيغۇرلارغا كۆرسەتكەن تەسىرى»، «ئىرقىي قىرغىنچىلىققا ئۇيغۇر سەنئىتى ئارقىلىق ئىنكاس قايتۇرۇش»، «ئۇيغۇر ئىرقىي قىرغىنچىلىقىنىڭ خەلقئارادىكى تەسىرى» «خىتاينىڭ ئۇيغۇر تارىخىنى بۇرمىلاش سىياسىتى ۋە مەدەنىيەت قىرغىنچىلىقى» ۋە «مېدىيا ۋە شەرقىي تۈركىستان مەسىلىسى» دېگەندەك تېمىلاردا دوكلات بەرگەندىن كېيىن، كۇرسقا ئىشتىراك قىلغان 40 ئەتراپىدا ئوقۇغۇچى بىلەن مەزكۇر تېمىلار توغرىسىدا مۇزاكىرە ئېلىپ بېرىلدى. ھەر بىر دوكلاتنىڭ ئاخىرىدا ئۈچ ئوقۇغۇچى ئۆزىنىڭ ئۇيغۇر دەۋاسىنى ئاڭلىتىش جەريانىدىكى تەجرىبىلىرىنى تونۇشتۇرۇپ ئۆتتى.
كۇرسنىڭ ئاخىرىدا يىغىن توغرىسىدا كۆز قارىشىنى ئىگىلەش ئۈچۈن بۇ پائالىيەتنى ئۇيۇشتۇرغان «ئۇيغۇر ھەرىكىتى» تەشكىلاتىنىڭ رەئىسى روشەن ئابباس خانىم ۋە كۇرسقا تۈركىيەنىڭ ھەرقايسى ئۇنىۋېرسىتېتلىرىدىن كېلىپ ئىشتىراك قىلغان ئۇيغۇر ئوقۇغۇچىلار بىلەن سۆھبەت ئېلىپ باردۇق.
روشەن ئابباس خانىم ئىستانبۇلدا ئۆتكۈزۈلگەن كۇرسنىڭ مۇۋەپپەقىيەتلىك ئۆتكۈزۈلگەنلىكىنى بايان قىلىپ مۇنداق دېدى: «بىز ئۇيغۇر ھەرىكىتى تەشكىلاتى ئىستانبۇلدا ئۇيغۇر ياشلىرىنى تەربىيەلەش كۇرسى ئۆتكۈزدۇق. كۇرسىمىز بۇرۇنقىدىكىلەرگە ئوخشاشلا مۇۋەپپەقىيەتلىك ئۆتتى دەپ قارايمەن. كۇرس جەريانىدا تۈركىيەدىكى ئۇيغۇر ياش ئاكتىپلار بىلەن سۆزلەشتىم. ئۇلار بىلەن ئۇيغۇر دەۋاسىنى تۈركىيەدىكى ئەمەلىي ئەھۋالنى ئاساس قىلىپ تۇرۇپ قانداق ئوتتۇرىغا قويۇش توغرىسىدا مۇزاكىرە ئېلىپ باردۇق. شۇنداقلا ئۇيغۇر ھەرىكىتى تەشكىلاتىنىڭ خەلقئارادىكى بولۇپمۇ ئامېرىكىدىكى پائالىيەتلىرى، ۋە بۇنىڭ تەسىرى توغرىسىدا مەلۇمات بەردىم. مۇۋەپپەقىيەتلىك بىر پائالىيەت بولدى».
روشەن ئابباس خانىم كۇرسنى خۇلاسىلەپ، بۇ قېتىمقى كۇرسنىڭ ئالاھىدىلىكىنىڭ قاتناشقان ياشلارنىڭ ئاكتىپچانلىقىنىڭ يۇقىرى بولۇشى، پەقەت ئىستانبۇلدىنلا ئەمەس تۈركىيەنىڭ باشقا شەھەرلىرىدىن كەلگەن ئۇيغۇر ئوقۇغۇچىلارنىڭ سانىنىڭ كۆپلۈكى ئىكەنلىكىنى بايان قىلدى.
تۈركىيەنىڭ بۇرسا شەھىرىدىن كېلىپ كۇرسقا قاتناشقان ئۇيغۇر پائالىيەتچى ئابدۇقادىر ئابدۇكېرىم كۇرس جەريانىدا ئۇيغۇر دەۋاسىنى قىلىشنىڭ ئۇسسۇلىنى، شۇنداقلا كۆپ يېڭى مەلۇماتلارنى ئۆگەنگەنلىكىنى بايان قىلدى.
كۇرسقا قاتناشقان بۇرسا ئۇلۇداغ ئۇنىۋېرسىتېتى دىنىي ئىلىملەر كەسپى ئوقۇغۇچىسى ئابدۇمېجىت ئابلىز بۇ خىل كۇرسلارنىڭ ئۇيغۇر ياشلارنى دەۋاغا يېتەكلەپ كىرىش ئۈچۈن پايدىلىق بولىدىغانلىقىنى ئوتتۇرىغا قويدى.
كۇرسقا قاتناشقان ئۇنىۋېرسىتېت ئوقۇغۇچىسى رەھىمە تۇرسۇن، تولۇق ئوتتۇرا مەكتەپ ئوقۇغۇچىسى مايىدە ئابدۇخەمىت، تومارىس مۇھەممەت، كانادادىن كېلىپ قاتناشقان مەھلىيە چېتىنقايا قاتارلىقلار كۇرس ھەققىدىكى سوئاللىرىمىزغا جاۋاب بېرىپ، كۇرسنىڭ ياخشى ئۆتكەنلىكىنى، ئۇيغۇرلار ۋە ئۇيغۇر دەۋاسى ھەققىدە يېڭى مەلۇماتلارنى ئىگىلىگەنلىكلىرىنى، بۇنىڭدىن كېيىنكى پائالىيەتلىرى ئۈچۈن يول كۆرسەتكۈچىلىك رولىنى ئوينايدىغانلىقىنى بايان قىلىشتى.
ئىستانبۇلدىن كۇرسقا قاتناشقان «يېڭى ئەۋلاد ھەرىكىتى» تەشكىلاتىنىڭ باياناتچىسى ئىبراھىم سىدىق بۇ خىل كۇرسلارنىڭ ئۇيغۇر ياشلىرىنى دەۋاغا قىزىقتۇرۇش ئۈچۈن ناھايىتى زور پايدىسى بولىدىغانلىقىنى، كۆپلەپ ئېچىش كېرەكلىكىنى ئوتتۇرىغا قويدى.
ئۇيغۇر ياشلىرىنى تەربىيەلەش كۇرسى ئاخىرلاشقاندىن كېيىن «ئۇيغۇر ھەرىكىتى» تەشكىلاتىنىڭ رەئىسى رۇشەن ئابباس خانىم بىلەن يولدىشى ئابدۇلھېكىم ئىدرىس ئەپەندىنى ئامېرىكانىڭ تۈركىيەگە يېڭى تەيىن قىلغان باش ئەلچىسى جەف فىلايك بىلەن ئايىلى شەرىل فىلايك خانىم قوبۇل قىلغان.
«ئۇيغۇر ھەرىكىتى» تەشكىلاتى بۇ كۇرسنىڭ 1-نۆۋەتلىكىنى 2021-يىلى 6-ئايدا تۈركىيەنىڭ ئىستانبۇل شەھىرىدە ئۆتكۈزگەن بولۇپ، مەزكۇر كۇرسقا تۈركىيەنىڭ ھەرقايسى ئۇنىۋېرسىتېتلىرىدا ئوقۇۋاتقان 50 ئۇيغۇر ئوقۇغۇچى قاتناشقانىدى.
خەۋەر مەنبەسى: ئەركىن ئاسىيا
