ﺋﺎﻣﯧﺮﯨﻜﯩﺪﯨﻜﻰ ﺋﺎﻗﯩﻠﻼﺭ ﺋﺎﻣﺒﯩﺮﻯ ﺑﻮﻟﻐﺎﻥ «PEW ﺗﻪﺗﻘﯩﻘﺎﺕ ﻣﻪﺭﻛﯩﺰﻯ»ﻧﯩﯔ ﻳﯧﯖﻰ ﺩﻭﻛﻼﺗﯩﺪﺍ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ، ﺧﯩﺘﺎﻳﻨﯩﯔ ﺋﻮﺑﺮﺍﺯﻯ 20 ﻳﯩﻠﺪﯨﻦ ﺑﯘﻳﺎﻥ ﺗﯘﻧﺠﻰ ﻗﯧﺘﯩﻢ ﺋﺎﻣﯧﺮﯨﻜﯩﻨﯩﯖﻜﯩﺪﯨﻦ ﻳﺎﺧﺸﯩﺮﺍﻕ ﺑﻮﻟﯘﭖ ﭼﯩﻘﻘﺎﻥ. ﺑﯘ ﻧﻪﺗﯩﺠﻪ PEW ﺋﯜﭼﯜﻧﻤﯘ ﮪﻪﻳﺮﺍﻥ ﻗﺎﻻﺭﻟﯩﻖ ﺑﻮﻟﻐﺎﻥ. ﻧﯘﺭﻏﯘﻥ ﺩﯙﻟﻪﺗﻠﻪﺭﺩﻩ ﺧﯩﺘﺎﻳﻐﺎ ﺑﻮﻟﻐﺎﻥ ﺋﯩﺠﺎﺑﯩﻲ ﻗﺎﺭﺍﺵ ﺭﯦﻜﻮﺭﺕ ﻳﺎﺭﺍﺗﻘﺎﻥ، ﺋﺎﻣﯧﺮﯨﻜﯩﻐﺎ ﺑﻮﻟﻐﺎﻥ ﻗﺎﺭﺍﺵ ﻧﺎﭼﺎﺭﻻﺷﻘﺎﻥ.

ﺩﻭﻛﻼﺗﺘﺎ ﻛﯚﺭﺳﯩﺘﯩﺸﯩﭽﻪ، ﺧﯩﺘﺎﻱ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﮔﻪ ﻳﯜﺭﮔﯜﺯﯨﯟﺍﺗﻘﺎﻥ ﺳﯩﻴﺎﺳﯩﺘﻰ (ﺋﯘﻳﻐﯘﺭ ﺋﯩﺮﻗﯩﻲ ﻗﯩﺮﻏﯩﻨﭽﯩﻠﯩﻘﻰ) ﯞﻩ ﻛﻮﺭﻭﻧﺎ ﯞﯨﺮﯗﺳﻰ ﺳﻪﯞﻩﺑﻠﯩﻚ ﻳﯧﻘﯩﻨﻘﻰ ﻳﯩﻠﻼﺭﻏﯩﭽﻪ ﺩﯗﻧﻴﺎﺩﯨﻜﻰ ﺳﻪﻟﺒﯩﻲ ﺋﻮﺑﺮﺍﺯﻯ ﺋﻪﯓ ﻳﯘﻗﯘﺭﻯ ﺩﯙﻟﻪﺗﻠﻪﺭ ﻗﺎﺗﺎﺭﯨﺪﯨﻦ ﺋﻮﺭﯗﻥ ﺋﯧﻠﯩﭗ ﻛﻪﻟﮕﻪﻥ. ﺑﯩﺮﺍﻕ ﺋﺎﺧﯩﺮﻗﻰ ﺑﯩﺮﻗﺎﻧﭽﻪ ﻳﯩﻠﺪﯨﻦ ﺑﯘﻳﺎﻧﻘﻰ ﺋﺎﻣﯧﺮﯨﻜﺎ ﺳﯩﻴﺎﺳﯩﺘﯩﺪﯨﻜﻰ ﺗﯘﺭﺍﻗﺴﯩﺰﻟﯩﻘﻼﺭ ﯞﻩ ﺋﺎﻣﯧﺮﯨﻜﯩﻨﯩﯔ ﺧﻪﻟﻘﺎﺭﺍﺩﺍ ﻳﺎﺭﺍﺗﻘﺎﻥ ﻏﻪﯞﻏﺎﻟﯩﺮﻯ ﺋﯘﻧﯩﯔ ﺋﻮﺑﺮﺍﺯﯨﻨﻰ ﺯﻭﺭ ﺩﻩﺭﯨﺠﯩﺪﻩ ﺳﯘﻧﺪﯗﺭﻏﺎﻥ.

ﺭﺍﻱ ﺳﯩﻨﺎﺷﻘﺎ ﻗﺎﺗﻨﺎﺷﻘﺎﻥ 36 ﺩﯙﻟﻪﺗﺘﯩﻜﻰ 42 ﻣﯩﯔ ﻛﯩﺸﯩﻨﯩﯔ ﺑﺎﮪﺎﺳﯩﺪﺍ، ﺷﻰ ﺟﯩﻨﭙﯩﯔ ﯞﻩ ﺗﺮﺍﻣﭗ ﮪﻪﺭ ﺋﯩﻜﻜﯩﺴﻰ ﺋﯩﺸﻪﻧﭽﯩﺴﯩﺰ ﻛﯩﺸﯩﻠﻪﺭ ﺳﺎﻧﺎﻟﻐﺎﻥ. ﺷﻰ ﺟﯩﻨﭙﯩﯖﻨﯩﯔ ﺩﯦﻜﺘﺎﺗﻮﺭﻟﯩﻘﻰ ﺋﯩﺘﯩﺮﺍﭖ ﻗﯩﻠﯩﻨﻐﺎﻧﻐﺎ ﺋﻮﺧﺸﺎﺵ، ﺗﺮﺍﻣﭙﻨﯩﯔ ﺗﯘﺭﺍﻗﺴﯩﺰﻟﯩﻘﯩﻤﯘ ﻧﻪﺯﻩﺭﮔﻪ ﺋﯧﻠﯩﻨﻐﺎﻥ. ﺋﯘﻻﺭﻏﺎ ﺑﯧﺮﯨﻠﮕﻪﻥ ﺋﯩﺸﻪﻧﭻ ﺋﺎﯞﺍﺯﻯ 50% ﻛﻪ ﻳﻪﺗﻤﯩﮕﻪﻥ.

ﺋﻪﻣﻤﺎ ﺧﯩﺘﺎﻳﻐﺎ ﺋﯩﺠﺎﺑﯩﻲ ﻗﺎﺭﺍﺷﻠﯩﺮﻯ ﻳﯜﻛﺴﻪﻟﮕﻪﻥ ﺩﯙﻟﻪﺗﻠﻪﺭﻧﯩﯔ ﻣﯘﺗﻠﻪﻕ ﻛﯚﭖ ﻗﯩﺴﻤﻰ ﺋﯘﻳﻐﯘﺭ ﺋﯩﺮﻗﯩﻲ ﻗﯩﺮﻏﯩﻨﭽﯩﻠﯩﻘﯩﻨﻰ ﯞﻩ ﺧﯩﺘﺎﻳﻨﯩﯔ ﻛﯧﯖﻪﻳﻤﯩﭽﯩﻠﯩﻚ ﺋﯩﺮﺍﺩﯨﺴﯩﻨﻰ ﺧﯩﻴﺎﻟﯩﻐﯩﻤﯘ ﻛﻪﻟﺘﯜﺭﯛﭖ ﻗﻮﻳﻤﺎﻳﺪﯨﻐﺎﻥ ﺋﺎﺳﯩﻴﺎ-ﺗﯧﻨﯩﭻ ﺋﻮﻛﻴﺎﻥ ﺭﺍﻳﻮﻧﻠﯩﺮﯨﺪﯨﻜﻰ ﺩﯙﻟﻪﺗﻠﻪﺭ ﺑﻮﻟﻐﺎﻥ. ﻣﻪﺳﯩﻠﻪﻥ؛ ﭘﺎﻛﯩﺴﺘﺎﻧﺪﺍ 90% ﻛﯩﺸﻰ ﺧﯩﺘﺎﻳﻐﺎ ﻳﯘﻗﯘﺭﻯ ﺑﺎﮪﺎ ﺑﻪﺭﮔﻪﻧﺪﻩﻙ.

ﻟﯧﻜﯩﻦ ﺑﯩﺰ، ﺧﯩﺘﺎﻳﻨﯩﯔ ﺋﯩﺮﻗﯩﻲ ﻗﯩﺮﻏﯩﻨﭽﯩﻠﯩﻖ ﺟﯩﻨﺎﻳﻪﺗﻠﯩﺮﻯ ﯞﻩ ﺑﺎﺷﻘﺎ ﻧﯘﺭﻏﯘﻥ ﺋﯩﻠﻠﻪﺗﻠﯩﺮﻯ ﺑﯩﻠﻪﻥ ﮪﺎﻣﺎﻥ ﺑﯩﺮ ﻛﯜﻧﻰ ﺩﯗﻧﻴﺎﺩﯨﻜﻰ ﺋﻪﯓ ﻧﺎﭼﺎﺭ ﺩﯙﻟﻪﺕ ﺋﻮﺭﻧﯩﻐﺎ ﭼﯜﺷﯜﭖ ﻗﺎﻟﯩﺪﯨﻐﺎﻧﻠﯩﻘﯩﻨﻰ ﺑﻪﺵ ﻗﻮﻟﺪﻩﻙ ﺑﯩﻠﯩﻤﯩﺰ.