ﺧﯩﺘﺎﻱ ﺭﯗﺳﯩﻴﻪ-ﺋﯘﻛﺮﺍﺋﯩﻨﺎ ﺋﯘﺭﯗﺷﯩﻨﯩﯔ ﺋﺎﺧﯩﺮﻟﯩﺸﯩﺸﯩﻨﻰ ﺧﺎﻟﯩﻤﺎﻳﺪﯗ
ﺋﯘﻛﺮﺍﺋﯩﻨﺎ ﺋﺎﺧﺒﺎﺭﺍﺕ ﺋﺎﮔﯧﻨﺘﻠﯩﻘﻰ (RBC-Ukraine) ﻧﯩﯔ 25-ﺩﯦﻜﺎﺑﯩﺮ ﺑﺎﻳﺎﻥ ﻗﯩﻠﯩﺸﯩﭽﻪ، ﭘﺮﯨﺰﺩﯦﻨﺖ ﺯﯦﻠﯩﻨﯩﺴﻜﯩﻲ ﺧﯩﺘﺎﻳﻨﯩﯔ ﺭﯗﺳﯩﻴﻪﻧﻰ ﺳﯜﻥﺋﯩﻴﮭﻪﻣﺮﺍﮪ ﺳﯜﺭﻩﺗﻠﯩﺮﻯ ﺑﯩﻠﻪﻥ ﺗﻪﻣﯩﻨﻠﻪﭖ، ﺋﯘﻛﺮﺍﺋﯩﻨﺎﻧﯩﯔ ﺋﯧﻨﯩﺮﮔﯩﻴﻪ ﺑﺎﺯﯨﻠﯩﺮﯨﻐﺎ ﮪﯘﺟﯘﻡ ﻗﯩﻠﯩﺸﯩﻐﺎ ﻳﺎﺭﺩﻩﻣﺪﻩ ﺑﻮﻟﯩﯟﺍﺗﻘﺎﻥ ﺑﻮﻟﯩﺸﻰ ﻣﯜﻣﻜﯩﻨﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺧﯩﺘﺎﻱ ﺭﯗﺳﯩﻴﻪﻧﻰ ﻛﻮﻣﭙﯩﻴﯘﺗﯧﺮ ﺳﺎﻧﻠﯩﻖ ﻣﻪﻟﯘﻣﺎﺕ ﺋﯘﭼﯘﺭﻟﯩﺮﯨﻨﻰ ﻛﻮﻧﺘﯩﺮﻭﻝ ﻗﯩﻠﯩﺶ ﺋﯜﺳﻜﯜﻧﯩﻠﯩﺮﻯ ﺑﯩﻠﻪﻥ ﺗﻪﻣﯩﻨﻠﻪﺷﻨﻰ ﺩﺍﯞﺍﻣﻼﺷﺘﯘﺭﻣﺎﻗﺘﺎ ﺋﯩﻜﻪﻥ.
ﺧﻪﯞﻩﺭﺩﻩ، ﺧﯩﺘﺎﻳﻨﯩﯔ ﺭﯗﺳﯩﻴﻪ-ﺋﯘﻛﺮﺍﺋﯩﻨﺎ ﺋﯘﺭﯗﺷﯩﻨﻰ ﺗﻮﺧﺘﯩﺘﯩﺶ ﺋﯩﻘﺘﯩﺪﺍﺭﯨﻐﺎ ﺋﯩﮕﻪ ﺑﻮﻟﺴﯩﻤﯘ، ﺑﯘ ﺋﯘﺭﯗﺷﻨﻰ ﺗﻮﺧﺘﯩﺘﯩﺶ ﻧﯩﻴﯩﺘﻰ ﻳﻮﻗﻠﯩﻘﻰ ﺑﯩﺮﻗﺎﻧﭽﻪ ﻧﯘﻗﺘﯩﺪﯨﻦ ﺷﻪﺭﮪﯩﻴﯩﻠﻪﻥﮔﻪﻥ:
1. ﺋﯘﺭﯗﺵ ﻗﺎﻧﭽﻪ ﺋﯘﺯﯗﻥ ﺩﺍﯞﺍﻣﻼﺷﺴﺎ، ﺭﯗﺳﯩﻴﻪ ﺧﯩﺘﺎﻳﻐﺎ ﺷﯘﻧﭽﻪ ﻣﻪﮪﻜﻪﻡ ﺑﺎﻏﻠﯩﻨﯩﺪﯗ. ﺑﯘﻧﯩﯔ ﺋﯜﭼﯜﻥ ﺋﯘﺭﯗﺵ ﺩﺍﯞﺍﻣﻠﯩﺸﯩﺸﻰ ﻛﯧﺮﻩﻙ.
2. ﺋﯘﺭﯗﺵ ﻗﺎﻧﭽﻪ ﺋﯘﺯﯗﻥ ﺩﺍﯞﺍﻣﻼﺷﺴﺎ، ﻳﺎﯞﺭﻭﭘﺎ ﺩﯙﻟﻪﺗﻠﯩﺮﯨﻨﯩﯔ ﻏﻪﺯﯨﻨﯩﻠﯩﺮﻯ ﻗﯘﺭﯗﻳﺪﯗ ﯞﻩ ﺷﯘﻧﭽﻪ ﺑﻪﻙ ﺯﻩﺋﯩﭙﻠﯩﺸﯩﺪﯗ. ﺑﯘ ﺧﯩﺘﺎﻳﻨﯩﯔ ﻣﻪﻧﭙﯩﺌﻪﺗﻰ ﺋﯜﭼﯜﻥ ﭘﺎﻳﺪﯨﻠﯩﻖ.
3. ﺋﺎﺟﯩﺰﻻﺷﻘﺎﻥ ﯞﻩ ﻣﻪﻏﻠﯘﭖ ﺑﻮﻟﻐﺎﻥ ﺭﯗﺳﯩﻴﻪ ﺧﯩﺘﺎﻳﻨﯩﯔ ﻣﻪﻧﭙﯩﺌﻪﺗﯩﮕﻪ ﺋﯘﻳﻐﯘﻥ ﺋﻪﻣﻪﺱ. ﺷﯘﯕﺎ ﺑﯘ ﺋﯘﺭﯗﺷﺘﺎ ﺭﯗﺳﯩﻴﻪﻧﻰ ﻣﻪﺧﭙﯩﻲ ﻗﻮﻟﻼﺷﻨﻰ ﺩﺍﯞﺍﻣﻼﺷﺘﯘﺭﯗﺵ ﻻﺯﯨﻢ.
ﺧﯩﺘﺎﻳﻨﯩﯔ ﻳﻪﻧﻪ ﺑﯩﺮ ﭼﻮﯓ ﺋﻪﻧﺪﯨﺸﯩﺴﻰ، ﺭﯗﺳﯩﻴﻪ-ﺋﯘﻛﺮﺍﺋﯩﻨﺎ ﺋﯘﺭﯗﺷﻰ ﺋﺎﺧﯩﺮﻻﺷﺴﺎ، ﺋﺎﻣﯧﺮﯨﻜﺎ ﯞﻩ ﻳﺎﯞﺭﻭﭘﺎﻧﯩﯔ ﻧﯩﺸﺎﻧﻰ ﺧﯩﺘﺎﻱ ﺑﻮﻟﯘﭖ ﻗﺎﻟﯩﺪﯗ. ﺧﯩﺘﺎﻱ ﺑﯩﯟﺍﺳﺘﻪ ﻧﯩﺸﺎﻧﻐﺎ ﺋﺎﻳﻠﯩﻨﯩﭗ ﻗﯧﻠﯩﺶ ﯞﺍﻗﺘﯩﻨﻰ ﺋﯘﺯﺍﺭﺗﯩﺶ ﺋﯜﭼﯜﻥ ﺭﯗﺳﯩﻴﻪ-ﺋﯘﻛﺮﺍﺋﯩﻨﺎ ﺋﯘﺭﯗﺷﯩﻨﯩﯔ ﺋﯘﺯﯗﻧﻐﺎ ﺳﻮﺯﯗﻟﯩﺸﯩﻨﻰ ﺧﺎﻻﻳﺪﯗ. ﻣﯘﺗﯩﺨﻪﺳﺴﯩﺴﻠﻪﺭ ﺑﯘ ﭘﯩﻜﯩﺮﻧﻰ ﺧﯧﻠﻰ ﺑﯘﺭﯗﻧﻼ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﯞﻩ ﺧﯩﺘﺎﻳﻤﯘ ﺋﯩﺘﯩﺮﺍﭖ ﻗﯩﻠﻐﺎﻥ.
ﺑﯩﺮﺍﻕ، ﺋﺎﺧﯩﺮﻻﺷﻤﺎﻳﺪﯨﻐﺎﻥ ﺋﯘﺭﯗﺵ ﻳﻮﻕ. ﺧﯩﺘﺎﻱ ﮪﺎﻣﺎﻥ ﺑﯩﺮﻛﯜﻧﻰ ﺩﯦﻤﻮﻛﺮﺍﺗﯩﻚ ﻗﯩﻤﻤﻪﺕ ﻗﺎﺭﺍﺷﻠﯩﺮﯨﻐﺎ ﺋﯩﮕﻪ ﻛﯜﭼﻠﻪﺭ ﺑﯩﻠﻪﻥ ﺟﻪﯕﮕﻪ ﻛﯩﺮﯨﺸﻜﻪ ﻣﻪﺟﺒﯘﺭ ﺑﻮﻟﯩﺪﯗ. ﺑﻪﻟﻜﯩﻢ، ﺑﯘ ﺟﻪﯕﻨﯩﯔ ﺋﺎﺭﻗﺎ ﭘﻪﺭﺩﯨﺴﯩﮕﻪ ﺋﯘﻳﻐﯘﺭﻧﯩﯔ ﺋﯩﺴﺘﯩﻘﺒﺎﻟﻰ ﻳﻮﺷﯘﺭﯗﻧﻐﺎﻧﺪﯗﺭ.
