ھىندىستان ھاۋا ئارمىيەسىنىڭ خىتايدىن ئېشىپ كېتىشى چوڭ ئىلگىرىلەش
خىتاي دۇنياغا زومىگەر بولۇش ئۈچۈن ھەربىي جەھەتتىن جىددىي ئىلگىرىلەۋاتقاندا، خىتاينىڭ رەقىبى، شەرقىي تۈركىستاننىڭ قوشنىسى بولغان ھىندىستان ھاۋا ئارمىيەسىنىڭ خىتايدىن ئېشىپ كېتىپ دۇنيادىكى 3-ئورۇندىكى ھاۋا ئارمىيە كۈچىگە ئىگە دۆلەتكە ئايلانغانلىقى جاكارلاندى. بۇ ئەلۋەتتە، خىتاي ئۈچۈن بىر شۇم خەۋەر.
قىسقىچە ( (WDMMA)) دەپ ئاتالغان (World Directory of Modern Military Aircraft) دېگەن ئورگان يېقىندا 103 دۆلەتتىكى 129 ھاۋا كۈچى ساھەسى، دېڭىز ساھەسى ۋە دېڭىزدىن ئۇچۇش ساھەسى ئۈستىدىن ئۇنىۋېرسال تەكشۈرۈش ئېلىپ بارغان. 48 مىڭ 82 ئايرۇپىلاننى خاتىرىگە ئالغان بۇ ئورگاننىڭ بىلدۈرىشىچە، ھىندىستان ھاۋا كۈچى ساھەسىدە قىسقا مۇددەت ئىچىدە تىز تەرەققىي قىلىپ، خىتايدىن ئۆتۈپ كەتكەن. 1716 ئۇرۇش ئايرۇپىلانى ھەم تىك ئۇچارلىرى بولغان ھىندىستان ھاۋا كۈچىدە ئامېرىكا ۋە رۇسىيەدىن قالسا، دۇنيادىكى 3-چوڭ دۆلەتكە ئايلانغان.
بۇ باھالاش يالغۇز ئايرۇپىلان سانىغا قاراپ ئەمەس، بەلكى ھۇجۇم ۋە مۇداپىيە ئىقتىدارى، ئارقاسەپ تەمىناتى، زامانىۋېلىشىش دەرىجىسى، مەشغۇلات مەشىقى قاتارلىق كۆپ تەرەپلەرنى ئۆز ئىچىگە ئالغان.
