ھىندىستان مەتبۇئاتى خىتاينىڭ ئۇيغۇر ئىرقىي قىرغىنچىلىقىنى ساياھەتچىلىك بىلەن يوشۇرىۋاتقانلىقىنى بايان قىلدى
ئۇيغۇر ھەرىكىتى تەشكىلاتىنىڭ ئۇچۇرلىرىنى مەنبە قىلغان ھىندىستاننىڭ <<The Sentinel>> ئاخبارات ئورگىنى خىتاي ھاكىمىيىتىنىڭ شەرقىي تۈركىستاندىكى ئىرقىي قىرغىنچىلىق جىنايەتلىرىنى ساياھەتچىلىكنى كەڭ كۆلەمدە تەشۋىق قىلىش ئارقىلىق يوشۇرۇشقا ئۇرىنىۋاتقانلىقىنى ئىلگىرى سۈردى.
خەۋەردە تەكىتلىشىچە، ئۇيغۇر ھەرىكىتىنى تەشكىلاتى X دا ئېلان قىلغان يازمىسىدا، خىتاينىڭ ئۇيغۇرلارغا مەجبۇرىي ئەمگەك، مەجبۇرىي تۇغماس قىلىش، ئائىلىلەرنى ئايرىۋېتىش قاتارلىق زوراۋانلىق سىياسەتلەرنى يۈرگۈزۈپ تۇرۇپمۇ، يەنە بىر ياقتىن ساختا سەھنىلەرنى ھازىرلاپ، ساياھەتچىلىكنى كۈچەيتىش ئارقىلىق ئۆز جىنايەتلىرىگە چاپان يېپىشقا ئۇرىنىۋاتقانلىقىنى بايان قىلغان.
