ياۋروپا خىتايغا ئىشەنگەننىڭ دەردىنى بولىشىچە تارتماقتا
ئالدىنقى كۈنلەر، گوللاندىيە ھۆكۈمىتى „Nexperia“نىڭ تېخنىكىسىنى خىتايغا ئۆتۈنىپ بېرىشكە مەجبۇر قالماسلىق ئۈچۈن ئۇنى ھۆكۈمەت تارمىقىغا ئۆتكۈزىۋېلىپ، شىركەتنىڭ خىتاي مەسئۇلىنى ئىشتىن بوشاتقان.
ئامېرىكا ئۇيغۇر مەجبۇرىي ئەمگىكى سەۋەبلىك قارا تىزىملىككە ئالغان گوللاندىيەنىڭ „Nexperia“ شىركىتىنىڭ خىتايدىكى ئانا شىركىتى بولسا بۇنىڭدىن ئۆچ ئېلىش ئۈچۈن، گوللاندىيەدىكى شىركەتنى مىكرو چىپقا ئائىت بەزى دىتاللار بىلەن تەمىنلەشنى توختاتقان. بۇنىڭ بىلەن، ياۋروپا ئاپتوموبىل سانائىتى پالەج ھالغا چۈشۈپ قېلىش گىرداۋىغا يۈزلەنگەن. چۈنكى، بىر ئاپتوموبىلنىڭ پۈتۈپ چىقىشى، مەزكۇر شىركەتنىڭ 500 تال پارچە زاپچاسلىرىغا ئىھتىياجلىق ئىكەن.
خىتاي بىر قولىدا مىكرو چىپ زاپچاسلىرىنى، يەنە بىر قولىدا سېرەك توپىنى چىڭ تۇتىۋېلىپ، ياۋروپاغا گويا „ئەگەر ئامېرىكادىن ئۇزاق تۇرمىساڭ، سېنىڭ ماشىنا سانائىتىڭنى بوغۇپ ئۆلتۈرىمەن“ دەپ ھۆكۈرەۋاتقاندەك.
گېرمانىيە، فرانسىيە، ھەتتا ياۋروپا ئىتتىپاقى ھەپتىلەردىن بۇيان خىتاي بىلەن بۇ ھەقتە جىددىي سۆھبەتلەر ئۆتكۈزگەن بولسىمۇ، ھىچبىر نەتىجىگە ئېرىشەلمىگەن. ماكرون ياۋروپا ئىتتىپاقىنىڭ ھازىرغا قەدەر قوللىنىپ باقمىغان (ACI) قانۇنىنى خىتايغا قوللىنىشنى تەشەببۇس قىلىپمۇ نەتىجىگە ئېرىشەلمىگەن. ئۇلار خىتايغا ئىشەنگەننىڭ، خىتايغا تايانغاننىڭ دەردىنى يەتكۈچە تارتماقتا.
