ياۋروپادىكى ئەڭ چوڭ خىتاي پاھىشە گورۇھى پاش قىلىندى
.
بىريۇسسېلدىن تارقالغان خەۋەرلەردىن مەلۇم بولىشىچە، بېلگىيە ساقچى دائىرىلىرى 8 يىلدىن ئارتۇق ۋاقىت سەرپ قىلىپ، كۆلىمى بېلگىيە، فرانسىيە، گېرمانىيە، شىۋېتسارىيە، گوللاندىيە ۋە چېخ جۇمھۇرىيىتىگە قەدەر كېڭەيگەن زور بىر پاھىشە گورۇھىنى پاش قىلىپ، ئۇلارنىڭ 38 نەپەر يىتەكچىسىنى قولغا ئالغان.
بۇ گورۇھنىڭ مەركىزىدىكى يادرولۇق ئەزانىڭ بىرى 80 ياشلىق بىر خىتاي ئەر بولۇپ، ئۇ بىريۇسسېل شەھەر ئىچىدە ياشايدىكەن. ئۇنىڭ مېھمانخانا ۋە شەخسىي تۇرالغۇسى باركەن. ئۇنىڭ 51 ياشلىق بىر شېرىكى ئىسپانىيەدىكى بىر مافىئا گورۇھىنىڭ باشلىقى ئىكەن.
بۇلار خىتايدا ئىشلىتىلىدىغان ۋىچاتتىن پايدىلىنىپ خىتاي قىزلىرىنى ھەشەمەتلىك تۇرمۇش ئۈچۈن بىريۇسېلغا كېلىشكە قىزىقتۇرىدىكەن. ئاندىن ئۇلارغا ئۆي ئىجارىگە ئېلىپ بېرىپ، ئۇلارنى بىر دۆلەتتە ئاز دېگەندە 2 يىل پاھىشە بولۇپ ياشاشقا مەجبۇرلايدىكەن. ئۇنىڭدىن كېيىن، بۇ پاھىشەنىڭ تۇرىۋاتقان دۆلىتىنى ئالماشتۇرىدىكەن.
بېلگىيە ئەدلىيە ئورگانلىرىنىڭ بىلدۈرىشىچە، بۇ پاھىشەلەر گورۇھى يەنە ئادەم ئۆلتۈرۈش، پۇل يۇيۇش، ساختا رەسمىيەتلەر ياشاش قاتارلىق كۆپخىل دىلولارغا چېتىلىدىكەن.
بېلگىيە دائىرىلىرى بۇ دىلونى ئىزچىل سىر تۇتۇپ كەلگەن بولۇپ، ياۋروپا مىقياسىغا تارالغان بۇ گورۇھنىڭ قالدۇق كۈچلىرىنى قولغا ئېلىشنى مۇھىم بىلگەن. بۇ دىلو بېلگىيە تارىخىدىكى ئاز كۆرۈلىدىغان چوڭ دىلو ھېسابلىنىدىكەن. بۇ يىل كۈزدە سوت ئېچىلىدىكەن. جىنايەت گورۇھىنىڭ باشلىرى ئاز دېگەندە 15 يىل كېسىلىدىكەن.
بۇندىن ئىلگىرىمۇ ياۋروپانىڭ بەزى ئەللىرىدە بۇ خىتاي جىنايەت گورۇھىنىڭ بىر قىسىم ئەزالىرىنىڭ قولغا ئېلىنغانلىقى توغرىسىدا خەۋەرلەر تارقالغان.
