كۈنسىرى قېرىۋاتقان خىتاي دۆلىتى – نەسلى قۇرۇتىلىۋاتقان ئۇيغۇرلار
خىتاي نوپۇسىدىكى قېرىش، دۇنيانىڭ نەزىرىدە نوقۇل ئىجتىمائىي ھادىسە ئەمەس، بەلكى جىددىي سىياسىي ۋە ئىقتىسادىي مەسىلە سۈپىتىدە دىققەت چەكمەكتە.
خەلقارا مەتبۇئاتلارنىڭ خىتاي ئىستاتىستېكىسىدىن نەقىل ئېلىپ بايان قىلىشىچە، خىتاي دۆلىتىنىڭ نوپۇسنىڭ كېمىيىپ كېتىش مەسىلىسىنى ھەل قىلىش ئۈچۈن تۈرلىك تەدبىرلەرگە مۇراجىئەت قىلىشىغا قارىماي، 2025-يىلى ئالدىنقى يىلىغا سېلىشتۇرغاندا يەنە 3 مىليوندىن ئارتۇق كىشى ئاز تۇغۇلۇپ، تارىختىكى ئەڭ يۇقۇرى رېكورتنى ياراتقان.
2050-يىلىغا بارغاندا، خىتايدا 60 ياكى 60 ياشتىن يۇقۇرىلارنىڭ سانى 520 مىليونغا يېتىپ، خىتاي دۆلىتى ئۈچۈن ئېغىر باش ئاغرىقى پەيدا قىلىدىكەن. بەلكى بۇ ۋەزىيەت، خىتاينىڭ كېلىچەكتىكى يېمىرىلىشىنىڭ ھەل قىلغۇچ ئامىللىرىنىڭ بىرىگە ئايلىنىپ قېلىشى مۈمكىن ئىكەن.
خىتاي ئالدىمىزدىكى يىللاردا ئەرلەرنىڭ پېنسىيەگە چىقىش يېشىنى 60 ياشتىن 63 ياشقا، ئاياللارنىڭ پېنسىيىگە چىقىش يېشىنى كەسپىگە قاراپ تۇرۇپ 50 ياشتىن 55 ياشقا ۋە 55 ياشتىن 58 ياشقا ئۆرلىتىدىكەن.
ئەمما خىتاينىڭ شەرقىي تۈركىستان خەلقىنىڭ نوپۇسىنى چەكلەش ئۈچۈن قوللىنىۋاتقان زالىملىقى، ۋەھشىيلىكىنىڭ ئۆرنىكى يوق. خىتاينىڭ ئۇيغۇر ئاياللىرىغا قاراتقان مەجبۇرىي تۇغۇت چەكلەش، مەجبۇرىي بالا چۈشۈرۈش، تۇغۇت ئىقتىدارىدىن مەھرۇم قالدۇرۇشتەك ئىنسانىيەتسىز جىنايەتلىرى شەرقىي تۈركىستاندا ھېلىھەم داۋاملاشماقتا.
