قالتىس جازا: ئامېرىكا ھاۋا ئارمىيە بازىسىنى سۈرەتكە تارتقان خىتايغا 60 كۈنلۈك نازارەت، 25 دوللار جەرىمانە
ياۋروپا-ئامېرىكىدا 4-5 يىلدىن بۇيان جاسۇسلۇق جىنايىتى بىلەن قولغا ئېلىنغان خىتايلار خېلىلا كۆپ بولدى. بۇ جاسۇسلارنىڭ بەزىلىرى شۇ دۆلەتتە قاماق جازالىرىغا مەھكۇم قىلىنغان بولسا، بەزىلىرى خىتايغا تاپشۇرۇپ بېرىلدى. ئەمما ساياھەتچى نامى بىلەن ۋەزىپىسىنى ئورۇنلاپ تۇتۇلۇپ قالغان خىتايلارنىڭ خېلى بىرقىسمى «ئۇقۇشماسلىق» ياكى «ناماقۇللۇق» بىلەن جازالاردىن قۇتۇلۇپ كەلمەكتە.
خىتايغا ئادالەتلىك مۇئامىلە قىلىش –ئۆزىگە ئادالەتسىزلىك قىلىشتۇر.
فېڭ بىڭكۈن (Bingkun Fen) ئىسىملىك «ساياھەتچى» بىر خىتاي 19-فېۋرال ئامېرىكا ئاندېرسېن ھاۋا ئارمىيە بازىسى (HSC-25) نى سۈرەتكە تارتىدۇ. ئامېرىكا دېڭىز ئارمىيەسىنىڭ ئۇشبۇ 25-تىك ئۇچار ئۇرۇش ئەترىتىنىڭ 50m يىراقلىقتىكى «كىرىشكە بولمايدۇ» دېگەن خەت يېزىلغان سىزىقىدىن بۆسۈپ كىرىدۇ، «سۈرەتكە تارتىشقا بولمايدۇ» دېگەن يەرلەرنى سۈرەتكە تارتىدۇ. خىتايچە يول باشلاش ئەپ دېتالىنىڭ مەنزىلىگە HSC-25 دەپ يېزىلغانلىقى، مەخسۇس HSC-25 نى سۈرەتكە تارتىش ئۈچۈن كەلگەنلىكى ئاشكارە بولىدۇ.
ئاخىرى 20-مارت سوتقا تارتىلغاندا، «خاتالىقلىرىنى» ئىتىراپ قىلىدۇ. سوت ئۇنىڭغا 60 كۈنلىك نازارەت ئاستىدا ئەركىن قويۇپ بېرىش ۋە 25 دوللار باھالاش ھەققى تۆلەش جازاسى بېرىدۇ. بۇندىن كېيىن ئامېرىكىغا قانۇنسىز كىرىشى چەكلىنىدۇ.
ئەلۋەتتە، شۇنداق ئويلاپ قېلىشلار بولىدۇ: ئەگەر ئامېرىكا سوتىنىڭ جازاسى بۇ بولسا، خىتايلار ئامېرىكىدا جاسۇسلۇق قىلىش ئۈچۈن، ئۆز دۆلىتىدە ئىلتىماسقا ئۆچۈرەتتە تۇرۇشى مۈمكىن. چۈنكى، بۇنىڭدىن كېلىدىغان چوڭ پايدىنى ۋە بۇنداق ئەرزان جازانى باشقا يەردىن تاپقىلى بولمايدۇ.
