زىبا مۇرات ترامپنىڭ «دۆلەت ئەھۋالىدىن مەلۇمات» سورۇنىغا تەكلىپ قىلىندى
.
2018-يىلىدىن بۇيان خىتاي تۇرمىسىدا يېتىۋاتقان دوختۇر گۈلشەن ئابباسنىڭ ئامېرىكىدا ياشاۋاتقان قىزى زىبا مۇرات ئامېرىكا ئاۋام پالاتاسىنىڭ رەئىسى مايىك جونسوننىڭ تەكلىۋى بىلەن سەيشەنبە كۈنى ئۆتكۈزۈلگەن ئامېرىكا پرىزدېنتى ترامپنىڭ «دۆلەت ئەھۋالىدىن مەلۇمات» تەقدىم قىلىش سورۇنىغا قاتناشقان. ئامېرىكا پرىزدېنتىنىڭ يىلدا بىر ئۆتكۈزىلىدىغان بۇ يىغىنىغا ئامېرىكا ئاۋام پالاتاسى ۋە كېڭەش پالاتاسىنىڭ ئەزالىرى ھەمدە دۆلەت ئەربابلىرىدىن سىرت، ئالاھىدە تەكلىپ قىلىنغان شەخىسلەر ئىشتىراك قىلغان.
ئاۋام پالاتاسىنىڭ رەئىسى مايىك جونسون بۇ ھەقتە: «بىز خىتاينىڭ ئىنسان ھەقلىرى دەپسەندىچىلىكلىرىنى خەلقارا جەمىيەتنىڭ دىققەت مەركىزىگە ئېلىپ كېلىش ۋە ناھەق تۇتۇپ تۇرۇلۇۋاتقانلارنىڭ ھەممىسىنى قويۇپ بېرىشكە چاقىرىشنى داۋاملاشتۇرۇۋاتقان پەيتتە، دوختۇر گۈلشەن ئابباسنىڭ قىزى زىبا مۇراتنى پىرېزىدېنت ترامپنىڭ دۆلەت ئەھۋالىدىن مەلۇمات بېرىش نۇتقىغا مېھمان سۈپىتىدە تەكلىپ قىلىش مەن ئۈچۈن شەرەپتۇر» دېگەن.
مەلۇم بولغىنىدەك، خىتاي ھاكىمىيىتى ئۇيغۇر ھەرىكىتى تەشكىلاتىنىڭ رەئىسى رۇشەن ئابباس خانىمنىڭ ئۇيغۇر ئىرقىي قىرغىنچىلىقىنى دۇنياغا ئاڭلىتىش پائالىيەتلىرىدىن ئۆچ ئېلىش ئۈچۈن، 2018-يىلى 11-سىنتەبىر ئۇنىڭ ھەدىسى گۈلشەن ئابباسنى قولغا ئېلىپ، 2019-يىلى 3-ئايدا قاماق جازاسىغا مەھكۇم قىلغان ئىدى. شۇندىن بۇيان، گۈلشەن ئابباس مەسىلىسى ئامېرىكا دۆلەت ئورگانلىرىدا ئىزچىل تىلغا ئېلىنىپ كەلمەكتە.
