مىللىتىمىزگە خەيىرلىك بولسۇن!
دېموكراتىيەنى ئىلگىرى سۈرۈش فوندى جەمىيىتىنىڭ بۇ يىللىق مۇكاپاتى رۇشەن ئابباس خانىمغا بېرىلدى
دېموكراتىيەنى ئىلگىرى سۈرۈش فوندى جەمىيىتىنىڭ 2025-يىللىق دېموكراتىيە مۇكاپاتى يىللاردىن بۇيان خىتاي كوممۇنىستىك پارتىيەسىنىڭ زالىم ھۆكۈمرانلىقىغا، مۇستەملىكە ئاستىدىكى شەرقىي تۈركىستاندا داۋام قىلىۋاتقان ئىرقىي قىرغىنچىلىققا، ئۇيغۇرلار دۇچ كېلىۋاتقان تۈرلىك پاجىئەلەرگە قارشى جاسارەت بىلەن كۆرەش قىلىپ كېلىۋاتقان ئۇيغۇر ھەرىكىتى تەشكىلاتىنىڭ قۇرغۇچىسى ۋە رەئىسى رۇشەن ئابباس خانىمغا بېرىلدى.
يېرىنى تاپقان، لايىقىغا ئېرىشكەن بۇ مۇكاپات خەلقىمىز ئۈچۈن بىر شەرەپتۇر. ھەقىقەتەنمۇ رۇشەن ئابباس خانىم مۇھاجىرەتتىكى ئۇيغۇر مىللىي ھەرىكىتى ساھەسىدە زور پىداكارلىق كۆرسىتىپ، خىتاي مۇستەبىت ھاكىمىيىتىنىڭ كۆزىگە قادالغان مىققا ئايلانغان، مەزلۇم خەلقىنىڭ دۇنيادىكى ئاۋازى بولۇپ، مىللىتىنى پەخرلەندۈرگەن بىر شەخس ئىدى. خەلقىمىز ئۈچۈن خەيىرلىك بولسۇن!
.
ھۆرمەتلىك تاھىر ئىمىن «ئۇيغۇر پوچتىسى»دا بۇ ھەقتە تەييارلىغان خەۋىرىدە تۆۋەندىكى بايانلارغا ئورۇن بەرگەن:
.
ئۇيغۇر ھەرىكىتى تەشكىلاتى ئامېرىكا دۆلەتلىك دىموكراتىيە فوندى جەمئىيىتىنىڭ 2025-يىللىق دىموكراتىيە مۇكاپىتىغا ئېرىشتى
.
ئامېرىكا دۆلەتلىك دىموكراتىيە فوندى جەمئىيىتى ھەر يىلى ئۇيۇشتۇرىدىغان يىللىق «دىموكراتىيە مۇكاپىتى» دۇنيانىڭ ھەر قايسى جايلىرىدا دىموكراتىيە، ئىنسان ھەقلىرى ئۈچۈن كۆرۈنەرلىك تۆھپە قوشقان تەشكىلات ۋە شەخسلەرنى تەقدىرلەيدۇ.
بۇ يىل مۇكاپات ئۇيغۇر ھەرىكىتى تەشكىلاتى ۋە ئۇنىڭ قۇرغۇچىسى رۇشەن ئابباسنىڭ ئۇيغۇرلار ئۈچۈن قىلغان خىزمىتى ئۈچۈن تەقدىرلەنگەن.
دۆلەتلىك دىموكراتىيە فوندى جەمئىيىتى ئورگان ھېسابىدا ئېلان قىلغان باياناتتا مۇنداق دېيىلگەن:
«2025-يىللىق «دېموكراتىيە مۇكاپاتى » خىتاي كوممۇنىستىك پارتىيىسىنىڭ ھۆكۈمرانلىقى ئاستىدا ياشاۋاتقان ئۇيغۇرلار ۋە باشقا مۇسۇلمان جامائەتلىرى ئۈچۈن قىلغان تىنماي قاناق يايدۇرۇلغان ھوقۇق قوغداش خىزمىتى ئۈچۈن «ئۇيغۇر ھەرىكىتى» تەشكىلاتىغا بېرىلدى. كېڭەش پالاتا ئەزاسى (سېناتور) مېل مارتىنېز تەرىپىدىن تەقدىم قىلىنغان بۇ مۇكاپات «ئۇيغۇر ھەرىكىتى» تەشكىلاتىنىڭ قۇرغۇچىسى ۋە ئىجرائىيە دېرېكتورى رۇشەن ئابباسنىڭ جاسارەتلىك رەھبەرلىكىنى مۇئەييەنلەشتۈرىدۇ. ئۇنىڭ رەھبەرلىكى خىتاي كوممۇنىستىك پارتىيىسىنىڭ زور كۆلەمدە تۇتقۇن قىلىشى ۋە باستۇرۇشى سەۋەبىدىن ۋەيران قىلىنغان ئۇيغۇر ئائىلىلىرى ئۈچۈن ئاۋاز بولدى.ئۇيغۇر ھوقۇقلىرى ئۈچۈن دۇنياۋى كۈچ بولغان رۇشەن ئابباس ۋە «ئۇيغۇر ھەرىكىتى» تەشكىلاتى بىزگە شۇنى ئەسكەرتىدۇكى: زۇلۇمنىڭ ئېغىر بېسىمى ئاستىدىمۇ جاسارەت ۋە ۋىجدان مەۋجۇت بولۇپ تۇرىدۇ.»
رۇشەن ئابباس مۇنداق دېگەن:
«ئۇيغۇرلارنىڭ بېشىغا كېلىۋاتقان ئىشلار- ئاكتىپ ئىرقىي قىرغىنچىلىقتۇر، ئۇ زور ساندا تۇتقۇن قىلىش، مەجبۇرىي ئەمگەك، زورلاپ تۇغماس قىلىۋېتىش ۋە بالا چۈشۈرگۈزۈش، مەجبۇرىي توي قىلدۇرۇش، ۋە بىر ئېتىقادنى پۈتۈنلەي جىنايەت سۈپىتىدە مۇئامىلە قىلىش بىلەن خاراكتېرلىنىدۇ. … بۇ ئەمدى پەقەت بىر ئۇيغۇر مەسىلىسىلا ئەمەس؛ بۇ خىتاينىڭ ئەركىنلىك ۋە دېموكراتىيەگە قارشى ئۇرۇشى، ئاياللار ۋە بالىلارغا قارشى ئۇرۇشى، شۇنداقلا ئىنسانىيەتنىڭ ئۆزىگە قارشى ئۇرۇشىدۇر.»
مۇكاپات تارقىتىش مۇراسىمى دابدۇغىلىق ئۆتكۈزۈلگەن بولۇپ، ئالاقىدار رەھبەرلەر، تاراتقۇچىلار، رۇشەن ئابباسنىڭ تۇققانلىرى ۋە دوستلىرى قاتناشقان.
ئۇيغۇر پائالىيەتچىلەر ئىنتېرنېتتا رۇشەن ئابباس ۋە ئۇنىڭ تەشكىلاتىنىڭ ئۇتۇقلىرىنى ئورتاق تەبرىكلەمەكتە.
تەييارلىغۇچى: تاھىر ئىمىن
