خىتاي بارغانسىرى يېتىملىك چەمبىرىكىگە سولانماقتا – «ئۆلمەكنىڭ ئۈستىگە تەپمەك»
ۋاڭيى ياۋروپاغا قاراتقان 7 كۈنلىك سەپىرىدە ياۋروپا ئىتتىپاقىنىڭ ھەمدە بېلگىيە، فرانسىيە ۋە گېرمانىيەنىڭ يۇقۇرى قاتلام رەھبەرلىرى بىلەن ئۇچرۇشۇپ، ئاخىرقى تەلىيىنى سىناپ بېقىشنى، يەنى Donald Trump نىڭ يۇقۇرى تاموجنا بېجىغا ئورتاق قارشى تۇرۇپ، خىتاينى بارغانسىرى چەتكە قېقىلىشتىن ساقلاپ قېلىشنى مەقسەد قىلغان.
بىراق، فرانسىيە ئاگېنتلىقىنىڭ بىلدۈرىشىچە، بۇ سەپەر خىتاي تاشقى ئىشلار مىنىستىرى ئۈچۈن خەيىرلىك بىر سەپەر ھېسابلانمايدىكەن. چۈنكى ياۋروپا ئىتتىپاقىغا ئەزا 27 دۆلەت ۋە ياۋروپا ئىتتىپاقىنىڭ كۈچ مەنبەسى بولغان بېلگىيە، فرانسىيە، گېرمانىيەلەر خىتايدىن تەدرىجى ئۇزاقلىشىپ، ئامېرىكا بىلەن ھەمكارلىشىش يولىنى تاللاپ بولغان.
9-ئىيۇل ئامېرىكانىڭ خىتايغا قويغان يۇقۇرى تاموجنا بېجى رەسمى ئىجرا قىلىنىدىغان بولۇپ، بۇ ۋەزىيەت خىتاينى نۇرغۇنلىغان دۆلەتلەر بىلەن بولغان ھەمكارلىقلاردىن ئۇزاقلىشىشقا مەجبۇرلايدىكەن.
«ئۆلمەكنىڭ ئۈستىگە تەپمەك» دېگەندەك، 1-ئىيۇل كۈنى ئامېرىكا، ئاۋىسترالىيە، ھىندىستان، ياپونىيەدىن ئىبارەت 4 دۆلەتنىڭ تاشقىي ئىشلار مىنىستىرلىرى بىر ئارىغا كېلىپ، ھىندى-تېنىچ ئوكيان رايونىنىڭ بىخەتەرلىكى ۋە تەمىنلەش زەنجىرىنىڭ مۇقىملىقىغا كاپالەتلىك قىلىشتا پىكىر بىرلىكى شەكىللەندۈرگەن. 4 تەرەپ ھەرساھە ھەمكارلىقلىرى توغرىسىدا ئەمەلىي كېلىشىملەر تۈزۈشكە باشلىغان.
