خىتاينىڭ راستىنلا تەيۋەننى قوراللىق ئىشغال قىلىش نىيىتى يوقمۇ؟
خىتاينىڭ شەرقىي تۈركىستان، تىبەت، جەنۇبىي موڭغۇلىيە ۋە خوڭكوڭدا مۇستەبىت رېجىمىنى مۇستەھكەملەپ بولغاندىن كېيىن، ئاساسىي نىشانىنىڭ تەيۋەن بولىۋاتقانلىقى ئۇزۇندىن بۇيان مۇتىخەسسىسلەر تەرىپىدىن ئوتتۇرىغا قويۇلۇپ كەلگەن.
ئامېرىكا ئاخبارات ئورگانلىرى 18-مارت دۇنيادىكى تەھدىتلەر توغرىسىدا ئېلان قىلغان دوكلاتىدا، خىتاينىڭ 2027-يىلى تەيۋەننى كۈچ ئىشلىتىش بىلەن قولغا كەلتۈرۈش پىلانى يوقلىقىنى ئىلگىرى سۈرگەن.
ئەمما خىتاي ئىزچىل ھالدا، كېرەك بولسا تەيۋەننى ھەربىي كۈچ بىلەن بوي سۇندۇرىدىغانلىقىنى ئىزچىل تەكىتلەپ كەلگەن.
ئامېرىكا دۆلەت مۇداپىئە مىنىستىرلىكىنىڭ ئۆتكەن يىلى دېكابىردا ئېلان قىلغان «خىتاي ھەربىي كۈچ دوكلاتى»دا، خەلق ئازادلىق ئارمىيىسىنىڭ 2027-يىلغىچە تەيۋەنگە قارشى ئۇرۇش قىلىش ۋە غەلىبە قىلىش ئىقتىدارىنى قولغا كەلتۈرۈشكە پا’ئال تەييارلىق قىلىۋاتقانلىقى ۋە مۇناسىۋەتلىك ھەربىي تاللاشلارنى ئۈزلۈكسىز مۇكەممەللەشتۈرۈۋاتقانلىقى ئوتتۇرىغا قويۇلغان.
تەيۋەن پرېزىدېنتى لەي چىڭتې ئۆتكەن يىلى نويابىردا خىتاينىڭ 2027-يىلىنى نىشان قىلىپ، ھەر خىل ھەربىي تەييارلىقلارنى ئىلگىرى سۈرۈۋاتقانلىقىنى ۋە بېيجىڭنىڭ 2027-يىلغىچە تەيۋەننى ھەربىي جەھەتتىن بىرلىككە كەلتۈرۈشنى تاماملاش مەقسىتىدە تەيۋەنگە قارشى تاجاۋۇزچىلىق قىلىش ھەربىي تەييارلىقلىرىنى تېزلىتىۋاتقانلىقىنى… ›كۈچ بىلەن بىرلىككە كەلتۈرۈشكە مەجبۇرلاش‹ ۋە ›كۈچ بىلەن تەسلىم بولۇشقا مەجبۇرلاش‹ ئارقىلىق تەيۋەننى قوشۇۋېلىشقا ئۇرۇنۇۋاتقانلىقىنى بىلدۈرگەن.
خىتاينىڭ يالغۇز ئامېرىكا ئۈچۈنلا ئەمەس، پۈتۈن دۇنيا ئۈچۈن زور تەھدىت ئىكەنلىكىنى شەرقىي تۈركىستان، تىبەت، جەنۇبىي موڭغۇلىيە ۋە خوڭكوڭدىكى پاجىئەلەردىن كۆرىۋالغىلى بولىدۇ.
