خىتاينىڭ ئەنگىلىيەدە كۈنسىرى كۈچىيىۋاتقان جاسۇسلۇق ھەرىكەتلىرى
بۈگۈن پۈتۈن دۇنيا خىتاينىڭ زامانىۋىي تور جاسۇسلۇقى ۋە ئەن-ئەنىۋىي كىشىلىك جاسۇسلۇقىنىڭ تەھدىتلىرىگە ئۇچرىماقتا.
ئەنگىلىيە بىخەتەرلىك مۇتىخەسسىسى گوردون كورەرا(Gordon Corera) نىڭ بىلدۈرىشىچە، خىتاي دۆلىتى ئۈچۈن جاسۇسلۇق خىزمەتلىرى بىلەن شۇغۇللىنىۋاتقانلارنىڭ سانى 500 مىڭ كىشىگە يېتىدىكەن. ھىچقانداق دۆلەت جاسۇسلۇق ئۈچۈن بۇنداق زور كۆلەمدىكى بىر كۈچنى تەشكىللىيەلمەيدىكەن.
بۇ 500 مىڭ جاسۇسنىڭ دۆلەت سىرتىدىكى خىزمەتچىلىرىنىڭ ۋەزىپىسى ئىقتىسادىي، ئىجتىمائىي، ھەربىي ساھەدىكى ئۇچۇرلارنى توپلاش، ئوغۇرلاش، ھەرخىل سالاھىيەتتە باشقا دۆلەتلەرنىڭ ھاكىمىيەت ۋە مۇھىم تەتقىقات ئورگانلىرىغا سىڭىپ كىرىش، دۆلەتنىڭ مۇھىم ئورگانلىرىدا خىزمەت قىلىدىغان شەخسلەرنى، تەسىرى كۈچلۈك سابىق دېپلوماتلارنى، ئىجتىمائىي تاراتقۇ چولپانلىرىنى، ئاخبارات ساھەسىدىكى قەلەمكەشلەرنى قولغا كەلتۈرۈش، ئۇيغۇر، تىبەت قاتارلىق ئۆكتىچى ۋە قارشى كۈچلەرنى بېسىقتۇرۇش قاتارلىقلارنى ئۆز ئىچىگە ئالىدىكەن.
ئەنگىلىيەنىڭ جاسۇسلۇققا قارشى تۇرۇش ئورگىنى بولغان M15 خىتاينىڭ ئەنگىلىيەدىكى جاسۇسلۇق ھەرىكەتلىرىنىڭ بارغانسىرى كۈچىيىۋاتقانلىقىنى، ئەمما دۆلەتنىڭ بۇنىڭغا قارشى ئۈنۈملىك تەدبىر قوللىنالمايۋاتقانلىقىنى ئىلگىرى سۈرگەن. M15 قانچە قېتىملاپ ئوتتۇرىغا كۆتۈرۈپ چىققان «خىتايغا جاسۇسلۇق ۋەقەلىرى» ئىتىبارغا ئېلىنمايلا قالماستىن، بەلكى «خىتاي دۈشمەنلىكى تەرغىباتى» مۇئامىلىسىگە ئۇچرىغان. خىتايغا ئىشەنگەن ئەنگىلىيەنىڭ ھەم ياۋروپانىڭ ھالىغا ۋاي دەيدىغانلار كۆپەيگەن.
