خىتايدىكى «دېموكراتىك تۇرمۇش يىغىنى» قانداق نەرسە؟
خىتاي ئاخبارات ۋاستىلىرىنىڭ خەۋەر قىلىشىچە، 15-يانۋار كۈنى شىنجاڭ ئۇيغۇر ئاپتونۇم رايونلۇق پارتكومنىڭ سېكرىتارى چېن شياۋجياڭنىڭ رەھبەرلىكىدە «دېموكراتىك تۇرمۇش يىغىنى» چاقىرىلغان.
دېمكراتىيە بولمىغان يەردە، دېموكراتىك تۇرمۇش بولمايتى. دېموكراتىك تۇرمۇش بولمىغان يەردە، بۇ خۇسۇستا يىغىن ئۆتكۈزۈشنىڭ مەنىسىمۇ يوق ئىدى. بىراق، قاچانلاردىن باشلاپكى خىتاي ھاكىمىيىتى «دېموكراتىك تۇرمۇش يىغىنى» دەيدىغان بىر نەرسىنى ئىجاد قىلىپ، خىتاي رەھبەرلىرىنى «ئۆز ئۆزى بىلەن ئىنقىلاپ قىلىش»قا مەجبۇرلاش سىياسەتلىرىنى يولغا قويغان. بۇ گويا 1960-يىللىرى ئۇيغۇر سەرخىللىرىنى كۆزدىن يوقىتىش ئۈچۈن، شەرقىي تۈركىستاندا يولغا قويۇلغان «ئېچىلىپ سايراش»نىڭ بىر ۋارىيانتىدەك.
بىرقانچە ھەپتە ئىلگىرى، خىتاي مەركىزى كومىتېتى سىياسىي بۈروسىمۇ خىتاي رەئىسى شى جىنپىڭنىڭ رەھبەرلىكىدە «دېموكراتىك تۇرمۇش يىغىنى» ئۆتكۈزگەن. بۇ يىغىندىمۇ خىتاي رەھبەرلىرى «ئۆز ئۆزى بىلەن ئىنقىلاپ قىلىش»قا مەجبۇرلىنىپ، شى جىنپىڭغا بولغان ساداقىتىنى ئىپادىلەشكەن.
بۈگۈنكى خىتايدا «شى جىنپىڭغا مۇتلەق ساداقەت بىلدۈرۈش»، خىتاي رەھبەرلىرىنىڭ چېرك ياكى ئەمەسلىكىنى ئۆلچەيدىغان ئاساسىي نىزام بولۇپ قالغان. بۇ ئۆلچەمگە چۈشمىگەنلىكى ئۈچۈن، 2023-يىلىدىن 2025-يىلىغىچە بولغان ئارىلىقتا شى جىنپىڭ ئۆزى تاللاپ ۋەزىپىگە قويغان 300 دىن ئارتۇق يۇقۇرى دەرىجىلىك خىتاي رەھبەرلىرى ئارمىيە ۋە پارتىيە ئىچىدىكى ۋەزىپىلىرىدىن ئېلىپ تاشلانغان.
