ئەڭ چوڭ «ئالدامچىلىق ئىمپېرىيەسى–شاھزادە گورۇھى» تارمار بولماقتا
37 ياشلىق چېن جى ئىسىملىك خىتاي تەرىپىدىن قۇرۇلغان <<شاھزادە گورۇھى>>، يەنى دۇنيادىكى ئەڭ چوڭ «ئالدامچىلىق ئىمپېرىيەسى» ئەنگىلىيە ۋە ئامېرىكانىڭ ھەمكارلىشىپ زەربە بېرىشى نەتىجىسىدە يېمىرىلىشكە باشلىغان.
ئامېرىكا ۋە ئەنگىلىيە ھۆكۈمەت دائىرىلىرىنىڭ 14-ئۆكتەبىردىكى بايانلىرىدىن مەلۇم بولىشىچە، 30 دىن ئارتۇق دۆلەتتە ئۆي-مۈلۈك، پۇل-مۇئامىلە تىجارىتى بىلەن شۇغۇللىنىدىغان قانچە ئونلىغان شىركەتلىرى بولغان <<شاھزادە گورۇھى>>نىڭ باش مەركىزى كامبودجادا بولۇپ، ئۇنىڭ خىتاي ۋە باشقا مىللەتلەردىن بولغان نۇرغۇنلىغان ئىنسانلارنى مەجبۇرىي ھالدا تور ئالدامچىلىقىغا سالغانلىقى ئاشكارىلانغان. چېن جى ئىسىملىك خىتاي ھازىر قېچىپ يۈرمەكتە ئىكەن. ئەگەر ئۇ تۇتۇلۇپ جىنايىتى بەكىتىلسە، 40 يىللىق قاماق جازاسىغا ئۇچرايدىكەن.
<<شاھزادە گورۇھى>>نىڭ تەخمىنەن 15 مىليارد دوللار قىممىتىدىكى بىتكويىن تەڭگىسى ئامېرىكا دۆلىتى تەرىپىدىن توڭلىتىلغان. ئەنگىلىيە ھۆكۈمىتى <<شاھزادە گورۇھى>>نىڭ بارلىق شىركەتلىرىنى پۇل-مۇئامىلە ساھەسىدىن سىقىپ چىقارغاندىن سىرت، ئۇنىڭ ئەنگىلىيەدىكى 12 مىليون فوندسىتېرلىڭ قىممىتىدىكى سارىيىنى، لوندۇندىكى 100 مىليون فوندسىتېرلىڭ قىممىتىدىكى خىزمەت بىناسىنى ۋە 17 يۈرۈش تۇرالغۇسىنى توڭلاتقان.
كامبودجا، بىرما ۋە تايلاندنى مەركەز قىلىپ ئالدامچىلىق ھەرىكەتلىرى بىلەن شۇغۇللىنىدىغان بۇ قارا گورۇھنىڭ يەنە تەيۋەن، سىنگاپور ۋە خىتايدىمۇ تارماقلىرى باركەن. ئۇلار Elon Mask نىڭ Starlink دېگەن سۈنئىي ھەمراھ تور ئۇلىنىشىدىن پايدىلىنىپ ھەرىكەت كۆلىمىنى كېڭەيتكەن.
دۇنيا بىر زىيانداشتىن بولسىمۇ تازىلانغۇدەك.
