ئۇيغۇر تەتقىقات مەركىزى خادىملىرى ھىندونىزىيەدە ئۇيغۇر ئىرقىي قىرغىنچىلىقىنى ئاڭلاتتى
مەركىزى ۋاشىڭتوندا بولغان ئۇيغۇر تەتقىقات مەركىزىنىڭ دىرېكتورى ئابدۇلھاكىم ئىدرىس باشچىلىقىدىكى بىر ۋەكىللەر ئۆمىكى 28-ئاپرىلدىن 7-مايغىچە ھىندونىزىيەنىڭ بىرقاچە شەھەرلىرىدە زىيارەتتە بولدى.
ئۇلار خىتاي مۇستەبىت ھاكىمىيىتىنىڭ شەرقىي تۈركىستاندا يۈرگۈزىۋاتقان ئىرقىي قىرغىنچىلىق جىنايەتلىرىنى كەڭ دائىرىدە ئاڭلىتىپ، كۈچلۈك جامائەت پىكرى ھاسىل قىلدى ۋە يەرلىك پۇخرالار تەشكىلاتلىرى، ئۇنىۋېرسىتېت ئوقۇغۇچىلىرى ھەمدە دىنىي ساھەدىكى زاتلارنىڭ ئۇيغۇرلارغا بولغان چۇڭقۇر ھېسداشلىقىنى قولغا كەلتۈردى.
ئۇيغۇر تەتقىقات مەركىزىنىڭ ۋەكىللەر ئۆمىكى يوگياكارتادىكى مۇھاممادىياھ ئۇنىۋېرسىتېتى، دۆلەتلىك ئىسلام ئۇنىۋېرسىتېتى، مېدان شەھرىدىكى ئال ۋاشلىياھ مۇسۇلمانلار ئۇنىۋېرسىتېتى قاتارلىق ئالىي مەكتەپلەردە نۇتۇقلار سۆزلىدى. ھىندونىزىيەنىڭ پارلامېنت ئەزالىرى ۋە ھىندونىزىيە دىنىي ئىشلار مىنىستېرى بىلەن ئۇچرىشىشلار ئۆتكۈزۈپ، ئىسلامنىڭ دۈشمىنى، يەرشارىنىڭ بۈيۈك ئاپىتى بولغان خىتاينىڭ ئۇيغۇر مۇسۇلمانلىرىغا سېلىۋاتقان زۇلۇملىرى، ئىرقىي قىرغىنچىلىق جىنايەتلىرىنى ئاڭلاتتى.
ئۇلار جاكارتادىكى ئىستىقلال مەسچىتىنىڭ ئىمامى ناسارۇددىن ئۇمار بىلەن ئۇچراشقاندا، ئۇنىڭ دىنىي ئىشلار مىنىستېرلىكىدىكى يېڭى ۋەزىپىسىنى قۇتلۇقلىدى ۋە شەرقىي تۈركىستاننىڭ نۆۋەتتىكى ۋەزىيىتىدىن مەلۇماتلار بەردى.
10 كۈن داۋام قىلغان بۇ زىيارەت ئالىي مەكتەپلەردىكى نۇرغۇنلىغان ھىندونىزىيەلىك ياشلارنىڭ قەلب رىشتىنى شەرقىي تۈركىستانغا باغلىدى. خىتاي ۋە ئۇنىڭ غالچىلىرىنىڭ ئۇيغۇر تەتقىقات مەركىزى خادىملىرىنى ھىندونىزىيەگە كىرگۈزمەسلىك ۋە ئۇلارنىڭ ھىندونىزىيەدىكى پائالىيەتلىرىنى چەكلەش يولىدىكى نومۇسسىزلارچە ئۇرۇنۇشلىرى رەسۋالارچە مەغلۇپ بولدى.
