ئوغرىلانغان تېلېفوننىڭ ئاخىرقى بېكىتى خىتاي
ئەگەر سىز يانفونىڭىزنى يۈتتۈرسىڭىز، ئىقتىسادىي زەربىگىلا ئەمەس، ئەسلىگە كەلتۈرگىلى بولمايدىغان مەنىۋىي زەربىگىمۇ ئۇچرايسىز. چۈنكى، ئۇنىڭدا سىزنىڭ ئەڭ قىممەتلىك خاتىرىلىرىڭىز ساقلانغان. ئۇنى مەڭگۈ قايتۇرۇپ ئالالمايسىز.
ئەنگىلىيەنىڭ كامبرىج (Cambridge) شەھرىدە بىرسىنىڭ قول تېلېفونى يۈتىپ كېتىدۇ. يانفون يۈتتۈرگەن قىز تورغا كىرىپ، تېلېفونىنىڭ ئىزىنى كۈزىتىدۇ. تېلېفون ئاۋال لوندونغا، ئاندىن دۇبەيگە، ئۇنىڭدىن كېيىن خىتايغا بېرىپ توختايدۇ.
ب ب س نىڭ 28-ئۆكتەبىردىكى خەۋىرىدە بايان قىلىنىشىچە، لوندۇندا يانفون ئوغۇرلىقى زور دەرىجىدە ئەۋىج ئالغان بولۇپ، 2019-يىلى 91 مىڭ 481 دانە يانفون ئوغۇرلانغان بولسا، 2024-يىلى 117 مىڭ 211 دانە يانفون ئوغۇرلانغان. يانفون يۈتتۈرگۈچىلەرنىڭ كۆپىنچىسى ساياھەتچىلەر بولغان.
گەرچە لوندۇن ساقچىلىرى ئەزا سانى 600 دىن ئارتۇق بولغان بىر ئوغۇرلۇق گورۇھى ھەققىدە مەلۇمات ئالغان بولسىمۇ، ئۇلارنى تۇتۇپ بولالمىغان. ئىشنىڭ ھەيران قالارلىق يېرى، بۇ ئوغۇرلانغان ماللارنىڭ ئاخىرقى بېكىتىنىڭ خىتاي بولىشىدۇر.
