ئامېرىكادىكى «زاپاس ساقلاش دولقۇنى»نىڭ پەردە ئارقىسىدا خىتاي ھاكىمىيىتى بار!
خىتاي تاراتقۇلاردا ئامېرىكىغا قارشى قۇۋلۇق-شۇملۇقلارنى قانات يايدۇرماقتا.
فرانسىيە ئاخبارات ئاگېنتلىقى قاتارلىق ئورگانلار ئېلان قىلغان يېڭى دوكلاتتا بايان قىلىنىشىچە، ھازىر خىتايدىكى دۇئويۈن، ۋېئىبو، خىتاي كۈندىلىك گېزىتى قاتارلىق ئۇچۇر ۋاستىلىرىدا «ئامېرىكادا زاپاس ساقلاش دولقۇنى» كۆتۈرۈلگەنلىكى ھەققىدە بەس-مۇنازىرىلەر قايناپ كەتكەن.
دوكلاتتا تىلغا ئېلىشىچە، ئامېرىكا-خىتاي ئوتتۇرىسىدىكى سودا ئۇرۇشى 90 كۈن توختىتىلغاندىن كېيىن، ئامېرىكا پۇخرالىرى بۇ مۇددەت توشۇپ، مالنىڭ باھاسى ئۆرلەپ كېتىشتىن ئىلگىرى، ماللارنى زاپاس ساقلىۋېلىش ئۈچۈن خىتاي ماللىرىنى بەس-بەستە سېتىۋېلىش دولقۇنى قوزغىغان. بەزىلىرى خىتايغا قۇرۇق چامىدان بىلەن ئۇچۇپ بېرىپ، چامىدانلىرىنى خىتاي ماللىرى بىلەن تولدۇرۇپ قايتىشقا باشلىغان. مۇنازىرە مۇنبەرلىرىدە ئامېرىكالىقلارنىڭ دۇكانلاردىكى خىتاي تېلېۋىزورلىرىنى «خىتاي ماللىرى ياخشى» دەپ تۇرۇپ تالىشىپ سېتىۋېلىۋاتقان كۆرۈنۈشلەرگە ئورۇن بېرىلگەن.
خىتاي ھۆكۈمىتىنىڭ رەسمىي تاراتقۇلىرىمۇ قاتناشقان بۇ بەس-مۇنازىرىدىكى ئاتالمىش «زاپاس ساقلاش دولقۇنى»غا دەلىل قىلىپ كۆرسىتىلگەن فىلىملەر ئەمەلىيەتتە 2018-يىلىغا تەۋە بولۇپ، خىتايلار ئامېرىكادىكى تاللا بازىرىدا ئېلىپ بېرىلغان «قارا جۈمە» سودىسىنىڭ كۆرۈنۈشىدىن ئۇستىلىق بىلەن پايدىلانغان.
مۇتىخەسسىسلەرنىڭ قارىشىچە، بۇ ئاتالمىش «زاپاس ساقلاش دولقۇنى» مۇنازىرىسى خىتاينىڭ ئىرادىسىگە ئۇيغۇن بولۇپ، خىتاي ھۆكۈمىتى تاراتقۇلاردىن ھىلىگەرلىك بىلەن پايدىلىنىپ «مانا، ئامېرىكالىقلارمۇ سودا ئۇرۇشىنىڭ دەردىنى تارتىۋاتىدۇ، بىز خىتايلارنىڭ تۇتقان يولى توغرا، بىز داۋاملىق بەرداشلىق بېرىشىمىز لازىم» دېگەننى ئىلگىرى سۈرۈپ، خىتاي ھاكىمىيىتى بىلەن خىتاي خەلقىنىڭ قارىشىنى بىرلەشتۈرۈش ئۈچۈن تېرىشماقتا ئىكەن. ئەمەلىيەتتە بۇ مۇنازىرىنى خىتاي ھۆكۈمىتى ئۆزى قوزغىغان ئىكەن.
